பரம்பொருள்-பதிவு-40

                   பரம்பொருள்-பதிவு-40

" காண்போரை கவர்ந்திழுத்து

மீண்டும் மீண்டும்

பார்க்கத் தூண்டும்

அழகுப் பதுமையாகவும் !"

" கண்டோரும் அள்ளி எடுத்து

அணைத்து முத்தமிட்டு

மகிழத் தூண்டும்

வசீகரப் புன்னகையுடனும் !"

"தங்கக் குழம்பை

வார்த்தெடுத்து பிரம்மாவால்

செதுக்கப்பட்ட

தங்கச் சிலையாகவும் !"

" புல்லாங்குழல் வழியாக

செல்லும் காற்றினால்

எழும் மெல்லிசையைப்

போன்ற குரலுடனும் !"

"சூரிய ஒளி பட்டு

மின்னும் வைரத்தைப்

போன்ற பொலிவுடனும் !"

விளங்கிய அக்குழந்தைக்கு

சிவநேசர் " பூம்பாவை "

என்று பெயரிட்டார்.

"ஆமாம் !

அந்த பெண்ணின் பெயர்

தான் பூம்பாவை !

அந்த பாவையின் பெயர்

தான் பூம்பாவை ! "

 "பாவை என்றால்

பெண் என்று பொருள் ;

பூம்பாவை என்றால்

பூவில் உள்ள அனைத்து

தன்மைகளையும் தன்னுள்

கொண்ட பெண் என்று பொருள் "

" பூம்பாவை

அழகு ததும்பும்

மங்கையாக ;

நற்குணங்களைக் கொண்ட

நங்கையாக ;

செல்வத்தில் மிதக்கும்

தாரகையாக ;

வளரத் தொடங்கினாள் "

" பூம்பாவைக்கு ஏழு வயது

நிரம்பியபோது - அவள்

பெண்ணுக்குரிய அனைத்து

குணநலன்களையும் கொண்டு

ஏழு வயதில் பெண்கள்

விளையாடும் அனைத்து

விளையாட்டுக்களையும்

விளையாடினாள் ; "

பூம்பாவை

" அ ன்பில் இவளை மிஞ்ச

யாரும் இல்லை என்று

சொல்லத்தக்க விதத்தில்

சிறந்து விளங்கினாள் ! "

" ஆ ளுமை செய்பவர்களும்

அடங்கி ஒடுங்கி பணிந்து

சேவகம் செய்யும் வகையில்

ஆளுமையில் உயர்ந்து

விளங்கினாள் ! "

" இ ல்லாதவருக்கு

மனமுவந்து வழங்குவதில்

கருணையின்  வடிவமாக

விளங்கினாள் ! "

" ஈ வதில் வரலாறு படைத்து

கடையேழு

வள்ளல்களுக்கெல்லாம்

முதன்மையானவளாக

விளங்கினாள் ! "

“ உ லகம் முழுவதும்

தேடினாலும் காணக்கிடைக்காத

அமைதியின் திருவுருவமாக

விளங்கினாள் !”

“ ஊ ரே வியக்கும் வகையில்

அருங்குணங்கள் பலவற்றைக்

கொண்டவளாக விளங்கினாள் !”

" எ ழுத்துக்களால் எழுதி

விளக்க முடியாத பண்பைப்

பெற்று பணிவுடன் விளங்கினாள் ! "

" ஏ ழைகளின் துயர்

துடைக்க ஓடுவதில்

முன்னிலையில் நிற்பதில்

தலைசிறந்து விளங்கினாள் ! "

" ஐ ந்து நிலங்களிலும்

தேடினாலும் கண்டுபிடிக்க

முடியாத அறிவில்

சிறந்தவளாக விளங்கினாள் ! "

" ஒ ருவரோடும் ஒப்பிட்டுக்

காட்ட முடியாத உயர்ந்த

ஒழுக்கங்களைக்

கொண்டவளாக விளங்கினாள் ! "

" ஓ ம்கார நாதத்தின்

திருஉருவமாகப் பிறந்து அதன்

விளக்கமாக விளங்கினாள் ! "

" ஔ ஷதமாக இருந்து

அனைவருடைய மனநோயை

விலக்கிய தெய்வத்தாயாக

விளங்கினாள் ! "

" பூம்பாவையின்

அருங்குணங்களையும்

அவளுடைய - அருமை

பெருமைகளையும் உணர்ந்த

சிவநேசர் பூம்பாவையை

மணந்து கொள்பவன்

என்னுடைய அளவிட

முடியாத அனைத்து

செல்வத்திற்கும்

உரியவனாவான்

என்று கூறினார் "

" இந்தக் காலகட்டத்தில்

திருஞான சம்பந்தர்

பாண்டியனுடைய வெப்பு

நோயை நீக்கியதையும் ;

அதனைத் தொடர்ந்து

திருஞான சம்பந்தர்

சமணர்களை அனல் வாதில்

வென்றதையும் ;

அதனைத் தொடர்ந்து

திருஞான சம்பந்தர்

சமணர்களை புனல் வாதில்

வென்றதையும் ;

அதனைத் தொடர்ந்து

திருஞான சம்பந்தரிடம்

தோற்றுப்போன 8000

சமணர்களை பாண்டிய

மன்னன் கட்டளைப்படி

கழுவில் ஏற்றியதையும் ;

அதனைத் தொடர்ந்து

மதுரையில் உள்ள அனைத்து

மக்களும் திருநீறு அணிந்து

புனிதர்கள் ஆனார்கள்

என்பதையும் ;

அதனைத் தொடர்ந்து

சமண மதத்தின் இருள் நீங்கி

சைவ மதத்தின் ஞான ஒளி

எங்கும் பரவியது என்பதையும் ;

அங்கிருந்து வந்த பலர்

சிவநேசரிடம் எடுத்து

உரைத்தார்கள் ;"

" திருஞானசம்பந்தரின்

தெய்வீகத் தன்மையைக்

கேட்டுத் தெரிந்து கொண்ட

சிவநேசர் அளவற்ற மகிழ்ச்சி

கொண்டு இச்செய்தியை

கொண்டு வந்த அனைவருக்கும்

பொன்னும் பொருளும்

வாரி வழங்கினார் !

திருஞான சம்பந்தர் இருக்கும்

திசை நோக்கி தொழுது

மண் மீது விழுந்து எழுந்து

என்னுடைய சுற்றத்தார்

உறவினர்கள் நண்பர்கள்

மட்டுமல்ல இந்த ஊரில்

உள்ள அனைவரும் நான்

சொல்வதைக் கேட்டுக்

கொள்ளுங்கள் ! - தெய்வத்

திருமேனி கொண்ட

திருஞான சம்பந்தருக்கு

என்னையும் ;

என்னுடைய பொருளையும் ;

என்னுடைய மகளையும் ;

தந்தேன் என்றார் "

" பூம்பாவை

திருஞான சம்பந்தரை

மண முடிப்பதற்காகவே

வளர்க்கப்பட்டாள் ;

திருஞான சம்பந்தருக்காகவே

வளர்ந்தாள் ;"

" திருஞான சம்பந்தரின் மேல்

கொண்ட அன்பினாலும்

அளவற்ற பக்தியினாலும்

மரியாதையினாலும் அவர்

நினைவாகவே வாழ்ந்தார்

சிவநேசர் "

-------- இன்னும் வரும்

---------- K.பாலகங்காதரன்

--------- 13-07-2019

//////////////////////////////////////////////////////////