அறிய வேண்டியவை-பதிவு-9

              ஜபம்-பதிவு-501

         (அறிய வேண்டியவை-9)

(துரோணர் குருகுலத்தில்

அமர்ந்து கொண்டிருந்தார் ;

துரியோதனன் துச்சாதனன்

மற்றும் அவருடைய

சகோதரர்கள் துரோணரிடம்

வந்து நின்றனர் )

துரியோதனன் :

“வணங்குகிறோம் குருவே !”

துரோணர் :

“வாருங்கள் ஏதேனும்

சொல்ல வந்தீர்களா ?

அல்லது ஏதேனும்

கேட்க வந்தீர்களா ? “

துரியோதனன் :

“இல்லை எங்களுக்கு

ஏற்பட்டிருக்கும்

சந்தேகத்தை தீர்த்துக்

கொள்வதற்காக வந்தோம்”

துரோணர் :

“சந்தேகம் என்பது

நமக்கு உள்ளே

நுழைந்தால்

நிம்மதி என்பது

நம்மை விட்டு

வெளியேறி விடும் ;

சந்தேகம் என்பது

உள்ளே வரும் போது

தனியாக வருவதில்லை ;

கூடவே கோபத்தையும்

பகைமையையும் சேர்த்தே

கூட்டிக் கொண்டு வரும் ;”

“ஆகவே , சந்தேகம்

என்பது ஏற்பட்டால்

உடனே அதனை

தீர்த்து விட வேண்டும்  ;

இல்லை என்றால்

அது வாழ்க்கையை

சூன்யமாக்கி விடும் “

“உங்களுக்கு ஏற்பட்டுள்ள

சந்தேகம் தான் என்ன?”

துரியோதனன் :

“குருவாக இருப்பவர்

சீடர்களுக்கு பாடங்களைக்

கற்றுத் தரும் போது

அனைவரையும்

சமமாகப் பாவித்து

அனைவருக்கும்

சமமான கல்வியைத்

தானே கற்றுத்

தர வேண்டும் “

துரோணர் :

:ஆமாம்! “

துரியோதனன் :

“ஆனால் குருவாக

இருக்கும் தாங்கள்

சீடர்களுக்கு கல்வியை

சமமாக கற்றுத்

தருவதில்லை ;

உங்களுக்கு

பிடித்தவர்களுக்கு

ஒரு மாதிரியும் ;

பிடிக்காதவர்களுக்கு

வேறு மாதிரியும் ;

கல்வியைக் கற்றுத்

தருகிறீர்கள் என்றும்

வேண்டப்பட்டவர்களுக்கு

மட்டும் முக்கியமான

விஷயங்களை

கற்றுத் தருகிறீர்கள் ;

என்றும் - நாங்கள்

சந்தேகப் படுகிறோம் “

துரோணர் :

“எதனால் இந்த

சந்தேகம் உங்களுக்கு

ஏற்பட்டிருக்கிறது ? “

துரியோதனன் :

“அர்ஜுனன் எங்களை

விட அனைத்து

கலைகளிலும்

சிறந்தவனாக

விளங்குகிறான் ;

நீங்களும் அவனிடம்

தனிப்பட்ட பிரியம்

காட்டுகிறீர்கள் ;

பிரதான சீடன்

என்ற நிலையில்  

அர்ஜுனனை

வைத்திருக்கிறீர்கள் ;

எங்களுக்கு கற்றுத்

தராத கல்வியை

அர்ஜுனனுக்கு

தனிப்பட்ட முறையில்

கற்றுத் தருகிறீர்கள்

என்ற சந்தேகம்

எங்களுக்கு

ஏற்பட்டிருக்கிறது ;”

துரோணர் :

“உங்களுக்கு என் மீதும்

நான் கற்றுக்

கொடுக்கும்

கல்வியின் மீதும்

சந்தேகம் ஏற்பட்டுள்ளது  ;

உங்களுக்கு ஏற்பட்டுள்ள

இந்த சந்தேகத்தை

நான் தீர்க்காமல்

கல்வியைத்

தொடர்ந்தால்

நான் சொல்லிக்

கொடுக்கும்

கல்வியால் யாருக்கும்

எந்தவிதமான நன்மையும்

ஏற்படப்போவதில்லை”

“உங்கள் மனதில்

ஏற்பட்டுள்ள

சந்தேகத்தை தீர்க்காமல்

நான் கல்வி

போதிப்பதை தொடர்ந்தால்

நீங்கள் - என்னுடைய

ஒவ்வொரு அசைவையும்

கண்காணிப்பீர்கள் ;

நான் எங்கே செல்கிறேன் ;

எங்கே போகிறேன் ;

என்று வேவு பார்ப்பீர்கள் ;

யாரிடம் பேசினாலும்

உங்களுக்கு

சந்தேகம் ஏற்படும் ;

அர்ஜுனனை - நான்

சந்தித்து பேசினாலும்

தனிப்பட்ட முறையில்

கல்வியை போதிப்பதாக

நினைத்துக் கொள்வீர்கள் ;

என்னை தனிமையில்

இருக்கவும் விட

மாட்டீர்கள் ;

நான் தனிமையில்

என்ன செய்து

கொண்டிருக்கிறேன்

என்று பார்த்துக்

கொண்டிருப்பீர்கள் ;

என்னுடைய

சுதந்திரம் பறிபோகும் ;”

“நான் என்ன

வார்த்தைகளை

பயன்படுத்தி சொன்னாலும்

எத்தகைய

உதாரணங்களைக்

காட்டினாலும்

உங்களுக்கு ஏற்பட்டுள்ள

சந்தேகத்தை

தீர்க்க முடியாது”

“சந்தேகம் என்பது

ஒரு மன வியாதி ;

அனுபவமே சந்தேகத்தை

தீர்க்கும் மருந்து ;”

“நாளை காலை வாருங்கள்

உங்களுக்கு ஏற்பட்டுள்ள

சந்தேகத்தை

நீங்களே உங்களுக்கு

ஏற்படப் போகும்

அனுபவத்தின் மூலம்

தீர்த்துக் கொள்ளப்

போகிறீர்கள்”

(அனைவரும்

சென்று விடுகின்றனர்)

----------- ஜபம் இன்னும் வரும்

----------- K.பாலகங்காதரன்

----------- 02-06-2020

//////////////////////////////////////////