பரம்பொருள்-பதிவு-100

          பரம்பொருள்-பதிவு-100

கிருஷ்ணன் :

"அர்ஜுனா ! நீ எப்போதோ

விதைத்து விட்டு வந்த

விதை ஒன்று இப்போது

மரமாக வளர்ந்து

அரவான் என்ற பெயரில்

பலன் தர உன்னைத் தேடி

நேரில் வந்து இருக்கிறது. "

"நீ ! யாருக்கும் தெரியாது

என்று செய்து விட்டு

வந்த செயலுடைய

விளைவானது உன்

முன்னால் அரவான்

என்ற பெயரில்

நிற்பதிலிருந்து

தெரிந்து கொள்………………?

செயலைச் செய்து விட்டு

விளைவிலிருந்து யாரும்

தப்ப முடியாது என்பதை !

நீ செய்து விட்டு

வந்த செயலுக்குரிய

விளைவாக அரவான்

உன் முன்னால்

வந்து நிற்கிறான் "

"அரவான் செய்யப் போகும்

வீரச் செயலை - இந்த

உலகத்தில் - இது

வரை யாரும் செய்து

இருக்க மாட்டார்கள்  ;

இனிமேலும் யாராலும்

செய்யவே முடியாது ; '"

"அரவான் செய்யப் போகும்

தியாகச் செயலைக் கண்டு

இந்த உலகமே

அரவானைப் பார்த்து

தலை தாழ்த்தி

வணங்கத் தான் போகிறது  "

"குருஷேத்திரப் போரின்

அஸ்திவாரமாக

இருக்கப் போகிறவன்

அரவான் !

பாண்டவர்களின்

வெற்றிக்கு காரணமாக

இருக்கப் போகிறவன்

அரவான் !

தர்மம் வெற்றி பெற

வேண்டும் என்பதற்காக

தன்னையே

தரப் போகிறவன்

அரவான் !

அதர்மத்தை அழிப்பதற்காக

மிகப்பெரிய

தியாகச் செயலைச்

செய்யப் போகிறவன்

அரவான் !

இந்த உலகம் அழியாமல்

இருக்க வேண்டும்

என்பதற்காக யாராலும்

செய்ய முடியாத

யாரும் செய்யவும்

யோசிக்கக் கூடிய

மிகப் பெரிய செயலை

செய்யப் போகிறவன்

அரவான் !

இந்த உலகம் முழுவதும்

தேடிப்பார்த்தாலும்

இத்தகைய ஒரு

தைரியமான மனத்தைக்

கொண்டவனை

பார்க்க முடியாது

என்று சொல்லத்தக்க

வகையில் செயலைச்

செய்யப் போகிறவன்

அரவான் !"

" நாளை இந்த உலகம்

கிருஷ்ணன் என்ற

கடவுளைக் கூட மறந்து

போய் இருக்கலாம்  ;

அர்ஜுனன் என்ற

ஒருவன் இருந்தானா

என்பதை தேடுவதற்காக

ஒரு கும்பலே

அலைந்து திரிந்து

கொண்டிருக்கலாம் ;

ஆனால் இந்த உலகம்

அழியும் வரை

அரவானை நினைத்துக்

கொண்டிருக்கக் கூடியவர்கள் 

இந்த உலகத்தில்

வாழ்ந்து கொண்டு தான்

இருக்கப் போகிறார்கள் ;

அரவானுக்காக கண்ணீர்

வடிக்கக் கூடியவர்கள்  

இந்த உலகத்தில் இருந்து

கொண்டு தான்

இருக்கப் போகிறார்கள் ;

அரவானை தெய்வமாக

வணங்கக் கூடியவர்கள் 

இந்த உலகத்தில்

வசித்துக் கொண்டு தான்

இருக்கப் போகிறார்கள் ;"

"அரவான்

நாளைய உலகத்தின்

விடிவெள்ளி !

எதிர்காலத்தின்

நம்பிக்கை நட்சத்திரம் !

இருண்ட வீட்டில்

ஒளி விளக்கு !

கோடை காலத்தின்

குளிர் நிலவு !

என்பதை நினைவில்

கொண்டால்

அரவானின் பெருமை

உனக்குப் புரியும் "

அர்ஜுனன்  :

"கிருஷ்ணா ! அரவான்

எத்தகைய வீரச்

செயலை புரிவான்  ;

எத்தகைய தியாகச்

செயலைச் செய்வான் ;

என்பதை அறிவதற்கு

என் மனம்

ஆவலால் துடிக்கிறது ;

எனக்கு அதை விவரமாகச்

சொல்வாயா கிருஷ்ணா "

கிருஷ்ணன்  :

"நாளை என்ன

நடக்கப்போகிறது

என்பதை அறிந்தால்

இன்றைய வாழ்க்கை

நரகமாகி விடும் என்ற

காரணத்தினால் தான்

நாளை நடக்கப்

போகிறவைகள்

மறைபொருளாக

வைக்கப்பட்டிருக்கிறது ;  

இன்று நடக்கப்

போகிறவைகளைப்

பற்றி சிந்தி அர்ஜுனா !

நாளை நடக்கப்

போகிறவைகளை நான்

பார்த்துக் கொள்கிறேன் ! "

"ஆனால் ஒன்று அர்ஜுனா

நாளை இந்த உலகம்

அர்ஜுனனின் மகன்

யார் என்று கேட்காது  ?

அரவானின் தந்தை

யார் என்று தான்

கேட்கப் போகிறது ?

என்பதை மட்டும்

நினைவில் கொள்

அர்ஜுனா !"

அர்ஜுனன்  :

(கிருஷ்ணன் சொல்வதைக்

கேட்டுக் கொண்டிருந்த

அர்ஜுனன் அரவானைப்

பற்றிய சிந்தனையில்

ஆழ்ந்தான்)

---------- இன்னும் வரும்

----------- K.பாலகங்காதரன்

---------- 17-12-2019

//////////////////////////////////////////

பரம்பொருள்-பதிவு-99

            பரம்பொருள்-பதிவு-99

“யாருக்கும் பயப்படாமல்

அரவான் பேசிய

அர்த்தம் நிறைந்த

வாத்தைகளைக் கொண்ட

பேச்சைக் கேட்ட

இந்திரன் அவையில்

உள்ளோர் அனைவரும்

அரவானின் மயக்கும்

பேச்சைக் கேட்டு

பேசுவதற்கு வார்த்தை

எதுவும் இல்லாமல்

இருந்த போதும்

தங்களையும் அறியாமல்

எழுந்து நின்றனர் “

“அர்ஜுனன்

எழுந்து நின்று

மகனே ! என்று

அழைத்துக் கொண்டே

அரவானை

நோக்கி சென்று

கொண்டிருந்தார் ;

அரவானும் தன்

தந்தை அர்ஜுனனைக்

கண்ட மகிழ்ச்சியில்

அர்ஜுனனை

நோக்கி ஓடினான்  

தன்னுடைய

தந்தை அர்ஜுனன்

காலில் விழுந்து

வணங்கினான் அரவான்;”

அரவான் :

“என்னை

ஆசிர்வதியுங்கள்

தந்தையே ! “

அர்ஜுனன் :

“எல்லா நலமும்

பெற்று வளமுடன்

வாழ்க மகனே !

(என்று சொல்லிக்

கொண்டே காலில்

விழுந்த அரவானை

தூக்கி நிறுத்தி

இறுக தழுவிக்

கொண்டான்

அர்ஜுனன்) ;”

“உன் அன்னை

எப்படி இருக்கிறார் ?”

அரவான் :

“தங்கள் நினைவாகவே

இருக்கிறார் ;

தங்களுக்காகவே

வாழ்ந்து

கொண்டிருக்கிறார் ;

என்றேனும் ஒரு

நாள் உங்களைக்

காண முடியும்

என்ற நினைப்பில்

வாழ்ந்து

கொண்டிருக்கிறார் ;

தங்களைக்

காண்பதற்கு காலம்

வழி ஏற்படுத்திக்

கொடுக்கும் என்ற

நம்பிக்கையுடன்

உயிரை

உடலில் வைத்துக்

கொண்டிருக்கிறார் ;

உங்களைத் தவிர

அவர் வேறு

எதையும் சிந்தனை

செய்வதில்லை ;

உங்களைப்

பற்றியே பேசிக்

கொண்டிருக்கிறார் ;

உங்கள்

சிந்தனையிலேயே

காலத்தை ஓட்டிக்

கொண்டிருக்கிறார் ;”

அர்ஜுனன் :

“உன் அன்னை

பெண்களுக்குள்

தெய்வம் ;

காணக்கிடைக்காத

மாணிக்கம் ;

மாசு குறையாத

தங்கம் ; “

அரவான் :

“ஆமாம்”

அர்ஜுனன் :

“உன் தாய் உன்னிடம்

என்ன சொல்லி

அனுப்பினார்?”

அரவான் :

“என் தாய் போர்

ஏற்படப்

போவதை அறிந்து

தந்தைக்கு

உதவியாக இரு

என்று என்னை

அனுப்பி வைத்தார் ;

தந்தை என்ன

சொன்னாலும் எதை

செய்யச் சொன்னாலும்

தட்டாமல் செய்ய

வேண்டும் என்று

சொல்லி என்னை

அனுப்பி வைத்தார் ;”

“என்னுடைய தாயின்

உத்தரவை ஏற்று

நான் தங்களைக்

காண வந்தேன் ;

போரில் உங்களுக்கு

துணையாக இருப்பேன் ;

எத்துன்பம் வரினும்

உங்களை விட்டு

விலக மாட்டேன் ;

நான் தங்களுக்காக

போர் புரிய

எனக்கு அனுமதி

வழங்க வேண்டும் ;”

அர்ஜுனன் : 

“அரவானே! நீ !

பாண்டவர்

சார்பாக போரில்

பங்கேற்பதைக் கண்டு

நான் மனம்

மகிழ்ச்சி

அடைகிறேன் ;

போர் நேரும் போது

நீ எங்களுக்கு

உதவி செய்வாயாக ;”

அரவான் :

“அப்படியே ஆகட்டும்”

“அர்ஜுனனும்

அரவானும் பேசி

முடித்த பின்

அர்ஜுனனிடமிருந்து

விடை பெற்றுச்

சென்ற அரவானை

அர்ஜுனன் மட்டுமல்ல

கிருஷ்ணனும்

அரவான் செல்வதையே

பார்த்துக்

கொண்டிருந்தார் ;”

---------- இன்னும் வரும்

----------- K.பாலகங்காதரன்

---------- 16-12-2019

//////////////////////////////////////////

பரம்பொருள்-பதிவு-98

            பரம்பொருள்-பதிவு-98

அரவான்  :

"அன்பும் ;கருணையும் ;

கொண்டவனாக

இந்த உலகத்தில்

நான் வாழ்வதற்கு

காரணமாக இருப்பவர் ;

உலகில் உள்ள

அனைத்து உயிர்களையும்

நேசிக்க வேண்டும்

என்று எனக்கு

கற்றுக் கொடுத்தவர் ;

தன்னைப் போல

பிறரை எண்ணும்

தன்மை உள்ளத்தில்

வர வேண்டும்

என்பதை எனக்கு

சொல்லிக் கொடுத்தவர் ;"

"பிறர் நமக்கு துன்பம்

செய்தால்

நாம் எவ்வாறு

கஷ்டப்படுவோமோ ?

அதே போல் தான்

பிற உயிர்களை

நாம் துன்புறுத்தும் போது

அந்த உயிர்களும்

நம்மைப் போல்

கஷ்டப்படும் - எனவே

பிற உயிர்களை

துன்புறுத்தக்கூடாது ?

என்ற உயர்ந்த நெறியை

எனக்கு போதித்தவர் ;"

"அன்பிற்கு

இலக்கணமாக இருப்பவர் ; ;

பாசத்திற்கு

பிறப்பிடமாக உதித்தவர் ;

மாதருக்குள்

மாணிக்கமாகத் திகழ்பவர் ;

பெண்களுக்குள்

வரலாறாக வசிப்பவர் ;

தாய்களுக்குள்

தெய்வத் தாயாக

வாழ்பவர் ;"

"தன்னுடைய கணவனை

எப்போதும் நினைவில்

வைத்து போற்றிக்

கொண்டிருப்பவர் ;

கணவரை கண்

கண்ட தெய்வமாக

அனுதினமும் வழிபட்டுக்

கொண்டிருப்பவர் ;

தன்னுடைய

கணவரைத் தவிர

வேறு யாரையும்

சிந்தனையால் கூட

தீண்டாதவர் ;"

"இந்த உலகம்

கண்டிராத அற்புத

பிறவி அவர்  ;

உலகமே கண்டிராத

அதிசயத்தின் அதிசயமாக

வாழ்ந்து கொண்டிருக்கும்

கருணை தெய்வமான

உலூபியே

என்னுடைய தாய் ;"

"அர்ஜுனன் தன்

இருக்கையில் இருந்து

எழ முயற்சி செய்தான்  ;

கிருஷ்ணன் அவன்

கையைப் பிடித்து

அழுத்தினான் ;

அவன் பேசட்டும்

என்று கண்ணால்

சொன்னார் கிருஷ்ணன்

அர்ஜுனன் தன்

இருக்கையில் அமர்ந்தான் ;"

"அரவான்

தொடர்ந்து பேசினான் "

அரவான்  :

"பொன்னைப் போன்ற

உடல் படைத்து

பொன்னிறமாக

ஒளிர்பவர்  ;

எஃகைப் போன்ற

உள்ளம் படைத்து

கஷ்டங்களை

புறமுதுகிட்டு

ஓடச் செய்தவர் ;

சிங்கம் நிகர்த்த

நடை கொண்டவர்  ;"

"அச்சம் என்றால்

என்ன என்றும்

அச்சத்திற்கான பொருள்

என்னவென்றும்

தெரியாதவர்  ;”

"யாருக்கும் எதற்கும்

எதைக் கண்டும்

எப்போதும்

எந்த காலத்திலும்

அஞ்சாதவர் ;

கலக்கம் என்ற

ஒன்று எப்போதும்

எழாத வகையில்

உறுதியான மனதைக்

கொண்டவர் ;"

"சூழ்ச்சிகளைத்

தகர்த்தெறிந்து

சூதுமதியினரை

அழித்தொழித்து

சூதினால் தன்னை

அழிக்க முடியாது

என்று நிரூபித்துக்

காட்டியவர்  ;

பெண்களை மதித்துப்

போற்றி தெய்வமென

வணங்கி வாழ்ந்து

கொண்டிருப்பவர் ;"

"எதிரிகளின் தூக்கத்தைக்

கலைத்து மரண

பயத்தை ஏற்படுத்திக்

கொண்டிருப்பவர்  ;

இந்த உலகத்தில்

வீரத்திற்கு

எடுத்துக்காட்டாக

திகழ்ந்து

கொண்டிருப்பவர் ;

இந்த உலகம் கண்டிராத

மாவீரனாக இருப்பவர் ;

இனியும் இந்த

உலகம் காண

முடியாத மாவீரனாக

இருக்கக் கூடியவர் ;"

"பீஷ்மரின் அன்பைப்

பெற்றவர்  ;

கிருபாச்சாரியாரின்

ஆசியைப் பெற்றவர்  ;

விதுரரின்

மதிப்பைப் பெற்றவர்  ;

துரோணாச்சாரியாரின்

பிரதம சீடரான

அர்ஜுனனே

என்னுடைய தந்தை !"

"நான் அவர்களுடைய

மகன்

என்னுடைய பெயர்

அரவான் "

---------- இன்னும் வரும்

----------- K.பாலகங்காதரன்

---------- 13-12-2019

//////////////////////////////////////////