பரம்பொருள்-பதிவு-102

                  பரம்பொருள்-பதிவு-102

சகுனி :

"சகாதேவன் "

துரியோதனன் :

"பாண்டவர்களில்

ஒருவனா? "

சகுனி :

"ஆமாம்"

துரியோதனன் :

"நம்முடைய எதிரிகளில்

ஒருவனான சகாதேவனா "

சகுனி :

"ஆமாம்"

துரியோதனன் :

"பாவம்

அமைதியானவன்  ;

ஒன்றும் அறியாதவன் ;

பரிதாபத்திற்குரியவன் ; "

சகுனி :

"எதிரியின் திறமையை

குறைவாக மதிப்பீடு செய்யக்

கூடாது மருமகனே ! "

"எதிரியின் திறமையை

சரியாக மதிப்பீடு

செய்யத் தெரியாதவன்

எதிரியிடம் தோற்கத்

தான் வேண்டும் "

"எதிரியின் திறமையை

சரியாக மதிப்பீடு செய்யத்

தெரிந்தவனால் மட்டுமே

எதிரியை வெல்ல முடியும்

என்பதை நினைவில்

வைத்துக் கொள் மருமகனே ! "

"சகாதேவன்

சாதாரணமான

ஆள் இல்லை  ;

சோதிட சாஸ்திரத்தில்

ஆதி முதல் அந்தம் வரை

அறிந்து வைத்திருப்பவன் ;

சோதிட சாஸ்திரத்தின்

அனைத்து சூட்சும

விஷயங்களையும்

ஐயமின்றி கற்றுத்

தேர்ந்தவன் ;

திரிகால ஞானத்தை

முறைப்படி பயன்படுத்தும்

முறை அறிந்தவன் ;

"உலகிலுள்ள அனைத்து

உயிர்களுக்கும்

இறந்த காலம் எதிர்காலம்

ஆகியவற்றை சோதிடத்தின்

மூலம் துல்லியமாகக்

கணித்து சொல்லக் கூடிய

திறமை இந்த உலகத்தில்

சகாதேவனைத் தவிர

வேறு யாருக்கும் இல்லை"

"களப்பலி கொடுப்பதற்கு

உகந்த நாள் எந்த

நாள் என்றும் ;

களப்பலியாக

கொடுப்பதற்கு தகுதியான

ஆள் யார் என்றும் ;

சகாதேவன் குறித்து

கொடுத்து அதை நாம்

செயல்படுத்தி விட்டோம்

என்றால் மூவுலகமும்

சேர்ந்து வந்து

நம்மை எதிர்த்தாலும் ;

மூம்மூர்த்திகளே

ஒன்றாக வந்து

நம்மை எதிர்த்தாலும் ;

நம்மை யாராலும்

தோற்கடிக்க முடியாது

மருமகனே !"

"வெற்றி நமக்குத் தான் !"

துரியோதனன் :

"ஆனால் சகாதேவன்

எதிரியாயிற்றே  !"

"அவன் எப்படி நாம்

களப்பலி கொடுப்பதற்கு

உகந்த நாளையும் ;

களப்பலியாக கொடுப்பதற்கு

தகுதியான ஆளையும் ;

குறித்துக் கொடுப்பான் "

"அப்படியே குறித்து

கொடுத்தாலும்

உண்மையைத் தான்

சொல்வான் என்பதை

நாம் எப்படி நம்புவது : "

சகுனி :

"சோதிட சாஸ்திரத்தில்

முக்கியமான இரண்டு

விதிகள் இருக்கிறது

மருமகனே ! "

" சோதிடம் பார்க்க

வருபவர் எதிரியாக

இருந்தாலும் அவர்

கேட்கும் கேள்விகளுக்கு

உண்மையை மறைக்காமல்

சொல்ல வேண்டும்

என்பது முதல்விதி "

"அதைப்போல சோதிடம்

பார்ப்பவர் சோதிடத்தை

யாருக்கு பார்க்கிறாரோ

அவரைப் பற்றிய

தகவல்களை யார்

கேட்டாலும் சொல்லக்

கூடாது என்பது

இரண்டாவது விதி "

"இந்த இரண்டு

விதிகளையும் உண்மையாக

யார் பின்பற்றுகிறாரோ

அவர் தான் சோதிட

சாஸ்திரம் அறிந்த

உண்மையான சோதிடர்  "

"இந்த இரண்டு

விதிகளையும் உயிரென

கடைபிடிப்பவன் சகாதேவன் "

"சகாதேவன்

எதிரியாயிற்றே என்று

நினைக்காமல் சகாதேவனை

நேரில் போய் சந்தித்து

களப்பலி கொடுப்பதற்கு

உகந்த நாளையும் ;

களப்பலியாக கொடுப்பதற்கு

தகுதியான ஆளையும் ;

கேட்டு அறிந்து கொண்டு

வா மருமகனே ! "

துரியோதனன் :

"அப்படியே ஆகட்டும்

மாமா "

(துரியோதனன்

சகாதேவனை

சந்திப்பதற்காக

செல்கிறான்)

---------- இன்னும் வரும்

----------- K.பாலகங்காதரன்

---------- 20-12-2019

//////////////////////////////////////////

பரம்பொருள்-பதிவு-101

           பரம்பொருள்-பதிவு-101

(அரண்மனைக்குள்

உள்ள ஒரு

அறையில் சகுனி

தீவிரமான சிந்தனையில்

ஆழ்ந்து இருக்கும்

போது துரியோதனன்

உள்ளே நுழைகிறான்)

துரியோதனன்  :

“மாமா ! எதைப் பற்றி

தாங்கள் தீவிரமாக

சிந்தித்துக்

கொண்டிருக்கிறீர்கள் “

சகுனி :

“போரில் எப்படி

வெற்றி பெறுவது

என்பதைப் பற்றி

யோசித்துக்

கொண்டிருக்கிறேன்

மருமகனே ! “

துரியோதனன் :

“இதில் யோசிக்க

வேண்டியது என்ன

இருக்கிறது மாமா !

போரில் வெற்றி

பெறப்போவது

நாம் தானே ! “

சகுனி :

“எதையுமே

சாதாரணமாக

எடுத்துக் கொள்ளக்

கூடாது மருமகனே  !

“மாயங்கள் செய்வதில்

வல்லவனும் ;

சூழ்ச்சி வலை

பின்னுவதில் திறமை

படைத்தவனும் ;

கண்கட்டு வித்தை

காட்டுவதில்

கை தேர்ந்தவனும் ;

ஏமாற்றுச் செயல்கள்

புரிவதில்

தன்னிகரற்றவனும் ;

கபட வேடதாரியுமான

கிருஷ்ணன்

பாண்டவர்கள் பக்கம்

இருக்கும் வரை

நாம் எதையுமே

சாதாரணமாக

எடுத்துக்

கொள்ளக்கூடாது

மருமகனே ! “

“பாண்டவர்களை

வெற்றி பெறச்

செய்வதற்கு எத்தகைய

குறுக்கு வழிகளையும்

கையாள்வான் ;

அந்த குறுக்கு

புத்திக்கார

கிருஷ்ணன் ;

நாம் அதற்கு

இடம் கொடுக்கவே

கூடாது மருமகனே ! “.

துரியோதனன் :

“என்ன செய்ய

வேண்டும்

என்று சொல்ல

வருகிறீர்கள் மாமா ! “

சகுனி :

“நாம் போரில்

வெற்றி பெற

வேண்டும் என்றால்

கண்டிப்பாக

களப்பலி கொடுக்க

வேண்டும்

என்பதை மறந்து

விட்டாயா மருமகனே ! “

துரியோதனன் :

“மறக்கவில்லை

மாமா !

களப்பலி

கொடுப்பதைப் பற்றி

பேசத் தான்

நான் உங்களிடம்

வந்தேன் “

சகுனி :

“ களப்பலி

கொடுப்பவர்களை

யாராலும் வெல்ல

முடியாது என்ற

விவரம்

உனக்கு தெரியுமா ? ”

மருமகனே !”

துரியோதனன் :

“தெரியும் மாமா ! “

சகுனி :

“போரில் நாம்

வெல்வதற்கு

களப்பலி கொடுக்க

வேண்டிய நாள்

எந்த நாள் என்றும் ;

களப்பலியாக

கொடுப்பதற்கு

தகுதியுடையவர்

யார் என்றும் ;

அறிந்து

கொள்ள வேண்டும்

மருமகனே ! “

துரியோதனன் :

“இதனை

துல்லியமாகக்

கணித்து சொல்லக்

கூடிய

சோதிட சாஸ்திரம்

தெரிந்தவர்கள்

இந்த உலகத்தில்

யார் இருக்கிறார்கள்

மாமா ! “

சகுனி :

“ஒருவன்

இருக்கிறான்

மருமகனே ! “

துரியோதனன் :

“யார் மாமா………….?”

---------- இன்னும் வரும்

----------- K.பாலகங்காதரன்

---------- 18-12-2019

//////////////////////////////////////////

பரம்பொருள்-பதிவு-100

          பரம்பொருள்-பதிவு-100

கிருஷ்ணன் :

"அர்ஜுனா ! நீ எப்போதோ

விதைத்து விட்டு வந்த

விதை ஒன்று இப்போது

மரமாக வளர்ந்து

அரவான் என்ற பெயரில்

பலன் தர உன்னைத் தேடி

நேரில் வந்து இருக்கிறது. "

"நீ ! யாருக்கும் தெரியாது

என்று செய்து விட்டு

வந்த செயலுடைய

விளைவானது உன்

முன்னால் அரவான்

என்ற பெயரில்

நிற்பதிலிருந்து

தெரிந்து கொள்………………?

செயலைச் செய்து விட்டு

விளைவிலிருந்து யாரும்

தப்ப முடியாது என்பதை !

நீ செய்து விட்டு

வந்த செயலுக்குரிய

விளைவாக அரவான்

உன் முன்னால்

வந்து நிற்கிறான் "

"அரவான் செய்யப் போகும்

வீரச் செயலை - இந்த

உலகத்தில் - இது

வரை யாரும் செய்து

இருக்க மாட்டார்கள்  ;

இனிமேலும் யாராலும்

செய்யவே முடியாது ; '"

"அரவான் செய்யப் போகும்

தியாகச் செயலைக் கண்டு

இந்த உலகமே

அரவானைப் பார்த்து

தலை தாழ்த்தி

வணங்கத் தான் போகிறது  "

"குருஷேத்திரப் போரின்

அஸ்திவாரமாக

இருக்கப் போகிறவன்

அரவான் !

பாண்டவர்களின்

வெற்றிக்கு காரணமாக

இருக்கப் போகிறவன்

அரவான் !

தர்மம் வெற்றி பெற

வேண்டும் என்பதற்காக

தன்னையே

தரப் போகிறவன்

அரவான் !

அதர்மத்தை அழிப்பதற்காக

மிகப்பெரிய

தியாகச் செயலைச்

செய்யப் போகிறவன்

அரவான் !

இந்த உலகம் அழியாமல்

இருக்க வேண்டும்

என்பதற்காக யாராலும்

செய்ய முடியாத

யாரும் செய்யவும்

யோசிக்கக் கூடிய

மிகப் பெரிய செயலை

செய்யப் போகிறவன்

அரவான் !

இந்த உலகம் முழுவதும்

தேடிப்பார்த்தாலும்

இத்தகைய ஒரு

தைரியமான மனத்தைக்

கொண்டவனை

பார்க்க முடியாது

என்று சொல்லத்தக்க

வகையில் செயலைச்

செய்யப் போகிறவன்

அரவான் !"

" நாளை இந்த உலகம்

கிருஷ்ணன் என்ற

கடவுளைக் கூட மறந்து

போய் இருக்கலாம்  ;

அர்ஜுனன் என்ற

ஒருவன் இருந்தானா

என்பதை தேடுவதற்காக

ஒரு கும்பலே

அலைந்து திரிந்து

கொண்டிருக்கலாம் ;

ஆனால் இந்த உலகம்

அழியும் வரை

அரவானை நினைத்துக்

கொண்டிருக்கக் கூடியவர்கள் 

இந்த உலகத்தில்

வாழ்ந்து கொண்டு தான்

இருக்கப் போகிறார்கள் ;

அரவானுக்காக கண்ணீர்

வடிக்கக் கூடியவர்கள்  

இந்த உலகத்தில் இருந்து

கொண்டு தான்

இருக்கப் போகிறார்கள் ;

அரவானை தெய்வமாக

வணங்கக் கூடியவர்கள் 

இந்த உலகத்தில்

வசித்துக் கொண்டு தான்

இருக்கப் போகிறார்கள் ;"

"அரவான்

நாளைய உலகத்தின்

விடிவெள்ளி !

எதிர்காலத்தின்

நம்பிக்கை நட்சத்திரம் !

இருண்ட வீட்டில்

ஒளி விளக்கு !

கோடை காலத்தின்

குளிர் நிலவு !

என்பதை நினைவில்

கொண்டால்

அரவானின் பெருமை

உனக்குப் புரியும் "

அர்ஜுனன்  :

"கிருஷ்ணா ! அரவான்

எத்தகைய வீரச்

செயலை புரிவான்  ;

எத்தகைய தியாகச்

செயலைச் செய்வான் ;

என்பதை அறிவதற்கு

என் மனம்

ஆவலால் துடிக்கிறது ;

எனக்கு அதை விவரமாகச்

சொல்வாயா கிருஷ்ணா "

கிருஷ்ணன்  :

"நாளை என்ன

நடக்கப்போகிறது

என்பதை அறிந்தால்

இன்றைய வாழ்க்கை

நரகமாகி விடும் என்ற

காரணத்தினால் தான்

நாளை நடக்கப்

போகிறவைகள்

மறைபொருளாக

வைக்கப்பட்டிருக்கிறது ;  

இன்று நடக்கப்

போகிறவைகளைப்

பற்றி சிந்தி அர்ஜுனா !

நாளை நடக்கப்

போகிறவைகளை நான்

பார்த்துக் கொள்கிறேன் ! "

"ஆனால் ஒன்று அர்ஜுனா

நாளை இந்த உலகம்

அர்ஜுனனின் மகன்

யார் என்று கேட்காது  ?

அரவானின் தந்தை

யார் என்று தான்

கேட்கப் போகிறது ?

என்பதை மட்டும்

நினைவில் கொள்

அர்ஜுனா !"

அர்ஜுனன்  :

(கிருஷ்ணன் சொல்வதைக்

கேட்டுக் கொண்டிருந்த

அர்ஜுனன் அரவானைப்

பற்றிய சிந்தனையில்

ஆழ்ந்தான்)

---------- இன்னும் வரும்

----------- K.பாலகங்காதரன்

---------- 17-12-2019

//////////////////////////////////////////